邊個屈香港人仇富？！

最近發生咗好多事，例如某法官姪女摑警案、某富豪買起大浪西、四眼仔恥笑人地要搭巴士好陰公．．．即刻有好多學者衝出嚟話呢ｄ事反映香港人仇富，咁樣講係超錯！

香港人話唒係最怕事、最冇膽同最理性嘅人種，係俾人打到口腫面腫都唔敢出聲嗰隻，而且見高就拜見低就踩，大部份仲要餐搵餐食餐餐清，真係得鬼閒同你仇富咩？

你地睇吓巴士車長同幾年前嘅紮鐵工人，只係企出嚟為自己爭取應得權益，都俾人小到飛起，就知道絕大部份香港人，自己雖然唔係有錢人，但思想上企喺有錢人一邊、仲識得幫有錢佬講嘢，我就話香港人係「拜富」先啱！

至於上述幾單嘢，完全同仇唔仇富冇關係！某法官姪女摑警案係質疑而家點解有兩條襲警罪、某富豪買起大浪西係因為佢破壞大自然、四眼仔恥笑人地要搭巴士係因為佢嘅態度，ｄ所謂學者屈我地仇富都痴孖筋！

仇富係生安白造，但有錢人仇貧就應該係真架喇！香港有錢佬完全唔知道咩叫發財立品。我地唔駛旨意佢地會食剩ｄ餅碎俾你，佢地只知道Winner takes all，即係要你屎都冇得食！睇吓領匯點樣瘋狂加租逼走小商戶、大家樂同巴士公司點樣對待員工，一分一毫都要賺到盡，就知道佢地係幾咁仇貧喇！

都話香港人係最理性嘅人種，你地睇吓我地俾人任意踐踏、任意壓榨，最多都只係敢小ｄ富豪幾句咋（不過講句粗口都要細聲ｄ，因為和平理性嘅香港人係最撚憎人講粗口），轉頭咪又係為咗間發水樓，乖乖奉獻大半世人工俾佢地！

香港貴為已發展地區中，貧富懸殊最高地區，但香港有冇咩亂事發生？從來都冇呀！香港而家富貧一家親，至少富人可以繼續剝削、窮人可以繼續睇唔起比自己窮嘅人，邊個話香港人仇富？曾特首可以日日寫「今天無事」！

喺十八世紀法國，同樣情況下，法國人燒咗巴士底監獄、處決埋個皇帝啦！