My Reflection

原來除咗毒男、宅男，而家仲有一個新嘅名詞叫草食男。男性由係會主動追求女性，即係肉食男，變成唔再主動出擊，寧願食素，成為草食男。而草食男多數都同時係毒男、宅男。毒男即女性絕緣體；宅男即寧願留喺屋企對住動漫、或沉迷其他嗜好。毒男、宅男、草食男其實係一體三面、三位一體。

點解無啦啦會變成草食男？其實主動出擊本來係男性嘅天性，變成草食男代表違反自然，所以每一個草食男背後一定有賺人熱淚、可歌可泣嘅故事，先會攪成咁。究竟有咩嘢衝擊令到咁多男性變成毒男、宅男、草食男？如果一個社會度有咁多呢ｄ男性，呢個社會係咪有ｄ問題？

我覺得女性只可遠觀，唔係話我嘅性取向變咗，但我就硬係覺得不能太接近女性。而家我朋友新識嘅女仔，第一句問你「What is your job？」、第二句「你有冇degree？」、第三句「你屋企嘅開支，你負擔幾多？」，呢ｄ連做朋友都費事，我唔一腳伸佢落海，已經算係聖人啦。

認真追女仔我又唔係未試過，番工放工搭車傾電話、番到屋企又傾、星期六日陪佢去呢度去嗰度，食飯行街，咩都做齊，不過一樣比人批評為「唔識氹人開心」，諗番都覺得攪咁多嘢，最後得啖笑，好無謂啫。過程中又要做主動、又要日日諗ｄ好笑嘢講，但最後就對方話事，「你係一個好人，不過．．．」，所以有咩理由唔變成草食男丫？